Söz verdiyimiz kimi jurnalist həmkarımız, həm də publisist-şair olan Heydər Oğuzun satirik məzmunlu şeirlərinin yayım hüququnu əldə etmişik, daha doğrusu, dostumuz özü belə bir lütfkarlıq edib. Odur ki, mütəmadi olaraq onun bənd-bənd “bəndə salınmış” düşüncələrini şeirsevərlərə təqdim edirik:
Kişilik
Köhnə kişilərdən nə əsər qalıb,
Üzlərdə nə vicdan təri görünür.
Nə aslan səsində bir kəsər qalıb,
Nə də dəvələrin nəri görünür.
İnsanlıq batdıqca günaha, suça,
Yox olaraq gedir kişilik puça.
Namərdə çevrilir mərd qaça-qaça,
Ruhən ölü, cismən diri görünür.
Dişiyə sahiblik kişi hünəri
Sayılandan bəri, olandan bəri,
Kimlər ola bilmir sözünün əri,
Hansısa xanımın əri görünür.
Kişilik-kobudluq, vəhşilik deyil,
Kişilik-erkəklik dişilik deyil,
Erkək doğulmaq da kişilik deyil
Baxmayın, cüssəsi iri görünür.
Qızları bətnində boğur analar,
Oğlanda görürlər uğur analar.
İndi ancaq kişi doğur analar,
Amma kişilərin yeri görünür.
Əxlaq bağlanandan var ağacına
Çıxar ağacına, kar ağacına,
Kişilik çəkilib dar ağacına,
Həyat o ağacdan bəri görünür.
Aclıqla çəkilir sınağa kişi,
Tuş gəlməsin-deyə qınağa kişi,
Necə boya çəksin yanağa kişi?
Çəksə də bir sümük, dəri görünür.
İnsanlıq kiçilir, bunun üçün də
Əməli verdiyi sözün gücündə
Min kişi paltarı geyən içində
Kişi licimində biri görünür.
