Keçmiş “Sovetski”, indiki Nəriman Nərimanbəyov prospektində həyata
keçirilən məcburi köçürülmə prosesi vətəndaşlar tərəfindən ciddi narazılığa
səbəb olub. Hər kvadratmetrə görə dövlətdən 1500 manat məbləğində pul təklifi
alan sakinlər, bu rəqəmin mövcud bazar qiymətlərindən bir neçə dəfə aşağı
olduğu fikrindədir.
Bununla bağlı Moderator.az saytını bilgiləndirən özəl mənbənin
sözlərinə görə, “Sovetski” sakinləri üzləşdikləri problemin həlli üçün tanınmış
hüquq müdafiəçilərinə müraciət etmək niyyətindədir: “Vətəndaşlar tanınmış QHT
rəhbərlərini, hüquq müdafiəçilərini problemin həllinə cəlb etməklə öz haqlarını
bərpa etmək niyyətindədirlər. Bu səbəbdən də yaxın günlərdə əksər QHT
rəhbərlərinə müraciət ünvanlanacaq. Sakinlər ümid edir ki, QHT rəhbərləri və
ölkə mediasının dəstəyi sayəsində problemi ictimaiyiləşdirmək və pozulan
haqlarını qismən də olsa bərpa etmək mümkündür. Hazırda QHT rəhbərlərinə
ünvanlanacaq müraciətin mətni və bu müraciətə əlavə olunacaq sənədlərlə bağlı
hazırlıq işləri davam edir”.
