Xədicə İsmayılova təklif olunan işdən imtina etdi

Jurnalist Xədicə İsmayılova iyulun 17-də Binəqədi Rayon Məhkəmə Nəzarətçiləri və Məhkəmə İcraçıları Şöbəsində olub. “Musavat.com”un məlumatına görə, məhkəmə icraçıları onu Əlillərin Bərpa Mərkəzinə aparıblar: “Orada funksional diaqnostika şöbəsində təmizlik işləri görməyi təklif etdilər. Soruşdum ki, bu məkan ictimaiyyət üçün açıqdırmı? Dedilər “Yox”. İmtina etdim. Mənə əvvəl təklif olunmuş süpürgəçi işi ilə təmin olunmağımı istədim. Dedim ki, ictimaiyyət üçün qapalı məkanda işləməyəcəyəm.

İcra məmuru işdən imtina edəcəyim halda məni həbs gözlədiyini dedi. Dedim ki, mən nə işdən, nə həbsdən qorxuram. Amma görəcəyim işi ictimaiyyətin gözü qarşısında görmək istəyirəm”.

“Azadlıq” radiosunun əməkdaşı Xədicə İsmayılova yanvarın 26-da Bakıda meriya ilə razılaşdırılmamış aksiyada iştirak etdiyinə görə 400 manat cərimələnib. Cərimə ödənmədiyindən Binəqədi Rayon Məhkəməsi iyunun 10-da jurnalistin 220 saatlıq ictimai işə cəlb olunması qərarı çıxarıb.