32 ildən sonra Bakıdan Ağdama yola düşən sərnişin qatarı ünvana çatıb. İlk qatarın sərnişinləri arasında ziyalılar, yazıçılar, tanınmış şəxslər, media nümayəndələri və Ağdam sakinləri olub.
Bizim.Media xəbər verir ki, Ağdamın işğaldan azad olunmasından sonra ilk səfərin bitməsi alqışlarla qarşılanıb.
MÖVZU İLƏ BAĞLI
32 ildən sonra İLK - Ağdama sərnişin qatarı yola düşdü - FOTO/VİDEO
Qonaqları Ağdam Dəmir Yolu və Avtovağzal kompleksində ictimaiyyət nümayəndələri qarşılayıb.
Xatırladaq ki, "Azərbaycan Dəmir Yolları" QSC (ADY) sərnişinlərə İsveçrənin "Stadler" şirkətinin istehsalı olan "FLIRT" markalı müasir qatarlarla xidmət göstərəcək. Sərnişinlərə “Standart”, “Standart+”, “Biznes” və “Birinci sinif” üzrə səyahət imkanları təklif olunacaq.
Hərəkət cədvəlinə əsasən, qatar şənbə günləri Bakıdan saat 07:10-da yola düşəcək, Ağdama 11:53-də çatacaq. Ağdamdan saat 18:20-də çıxan qatar isə saat 22:55-də Bakı Dəmiryol Vağzalında olacaq.
Sərnişinlər marşrut üzrə Bakı, Biləcəri, Ucar, Ləki, Yevlax, Bərdə, Köçərli, Təzəkənd və Ağdam stansiyalarından istifadə edə biləcəklər. Bakıdan Bərdə və Köçərli stansiyasına, Təzəkənd dayanacağına biletlərin minimum qiyməti 12 manat, Ağdam Dəmir Yolu və Avtovağzal Kompleksinə isə 12,80 manat təşkil edir.
Səfər zamanı qatarda ödənişsiz "Wi-Fi" xidmətindən yararlanmaq mümkün olacaq.
İşğaldan azad edilmiş ərazilərə qatarla komfortlu səfərlərin təşkili məqsədilə Bakı–Ağdam–Bakı marşrutu üzrə bilet alışı zamanı portaldan avtomatik icazə təmin olunacaq.
32 il öncə təxminən 9 saata qət edilən yolu bundan sonra 4 saata getmək mümkün olacaq.
Günay Şahmar, Pərviz Allahverdiyev, Bizim.Media
