Tibbi Ərazi Bölmələrinin İdarəetmə Birliyinin (TƏBİB) İctimaiyyətlə əlaqələr şöbəsinin məsləhətçisi Elnarə Baxış qurumdakı fəaliyyətinə son qoyub.
Bizim.Media xəbər verir ki, Elnarə Baxış bu barədə şəxsi hesabında məlumat verib.
O, bildirib ki, öz xahişi ilə TƏBİB-dən ayrılıb və qurumun fəaliyyətə başladığı gündən etibarən təxminən 5 il burada çalışıb.
“Fəaliyyətimin ilk günündən etibarən, yeni yaranan bir qurumun müsbət imicinin formalaşması və media ilə əlaqələrinin inkişafı üçün əlimdən gələni etməyə çalışdım. Bu illər ərzində həm böyük iş təcrübəsi qazandım, həm də peşəkar bir komanda ilə işləmək imkanı əldə etdim”, – deyə o qeyd edib.
Elnarə Baxış ona etimad göstərən keçmiş və indiki rəhbərlərə, həmkarlarına, tibb işçilərinə və media nümayəndələrinə təşəkkürünü bildirib:
“5 il əvvəl mənə etimad göstərib TƏBİB-ə dəvət edən keçmiş həmkarlarıma, sonrakı dövrdə fəaliyyətimin uğurlu olmasına dəstək olan rəhbərliyə, dəyərli tibb işçilərinə və jurnalist dostlarıma təşəkkür edirəm. Hər son bir başlanğıcdır. Mənim üçün də yeni yolun başlanğıcı çox yaxındadır və bunu tezliklə sizinlə bölüşəcəyəm”.
Bizim.Media
