Tədbirə dəvət olunsalar da, iştirak etməyən müxalifət partiyalarının bu davranışlarını müzakirə etməyə və onları suçlamağa ehtiyac görmürəm. Yəqin ki, onlar da zaman-zaman bu prosesə qoşularlar. Çünki müxalifət qüvvələrinin hamısının bir arada olması sosial sifarişdir. Hələlik bu gün Bir araya gələnlərlə yola davam ediləcək”.
Dekabrın 25-də müxalifət partiyalarının iştirakı ilə ölkədə yaranan şəraitin müzakirə olunduğu toplantı əks-siyasi düşərgəni yenə də tam əhatə etmədi. Müxalifət daxilində özləri üçün “xüsusi status” müəyyənləşdirən Müsavat və Xalq Cəbhəsi (AXCP), BAXCP, VHP, Böyük Quruluş Partiyası, ReAl Partiyası və digər partiyalar sözügedən toplantının təşkilatçılarının birlik çağırışına qoşulmadılar.
BAXCP sədrinin müavini Niyaməddin Orduxanlı bildirib ki, tədbirin təşkilatçılarından partiyaya heç bir dəvət göndərilməyib
Qeyd edək ki, müxalifətin 25 dekabr toplantısı hər hansı yeni formatın yaradılmasını nəzərdə tutmayaraq, sadəcə, ölkədəki vəziyyətin müzakirəsinə həsr olunmuşdu. Yəni o tədbirdə iştirak edən partiyalar bununla öz üzərilərinə heç bir öhdəlik götürmürdülər. Lakin bir neçə partiya düşərgədaxili həmkarlarını həqiqi müxalifət saymayaraq, onların çağırışına səs vermədilər.(AnTv)
