Oğuz-Kərimli-Şəki avtomobil yolunun Yaqublu kəndi ərazisindən keçən hissəsində yol-nəqliyyat hadisəsi baş verib.
Bizim.Media-nın yerli bürosu qəzanın ilkin təfərrüatlarını əldə edib.
Hadisə şahidlərinin sözlərinə və qəza yerinin müayinəsindən sonra məlum olub ki, VAZ - 2106 markalı avtomobil hərəkətdə olarkən idarəetmədən çıxaraq yolun kənarındakı ağaca çırpılıb. Bu zaman avtomobildə iki nəfər olub.
Onlardan biri nəqliyyat vasitəsini idarə edən Mingeçevir şəhər sakini, 31 yaşlı Afiq Hacıyevdir.
Məlum olub ki, sürücü sərt döngədə sürət həddini endirmədiyindən avtomobil yoldan çıxaraq, qoz ağacına çırpılaraq aşıb.
Hadisə nəticəsində sürücü və avtomobildə olan digər şəxs 21 yaşlı Fatimə Məmmədli də müxtəlif dərəcəli bədən xəsarətləri alıblar.
Qəza baş verən yerə Təcili Tibbi yardım briqadası cəlb olunub və hər iki şəxs Oğuz Rayon Mərkəzi Xəstəxanasına çatdırılıb. Hər iki şəxsə ilkin tibbi yardım göstərilib, vəziyyətləri orta-ağır qiymətləndirilir.
Baş vermiş qəza ilə bağlı araşdırma aparılır.
Tural Rasimoğlu, Bizim.Media, Şimal-Qərb bürosu
