“Prezident İlham Əliyevin 2024-cü il 13 yanvar tarixli Sərəncamı ilə Ağdam-Əsgəran-Xocalı-Xankəndi avtomobil yolunun yenidən qurulması işləri sürətlə davam etdirilir”.
Bizim.Media xəbər verir ki, bu barədə yolda aparılan tikinti işləri barədə jurnalistlərə açıqlama verən Azərbaycan Avtomobil Yolları Dövlət Agentliyinin nümayəndəsi Məmməd Məmmədov bildirib.
“Bərdə-Ağdam avtomobil yolunun 40-cı kilometrlik hissəsindən ayrılan Ağdam-Əsgəran-Xocalı-Xankəndi avtomobil yolunun ümumi uzunluğu 33,6 kilometr təşkil edir. Qarabağın inkişaf planı nəzərə alınaraq, avtomobil yolu 1 və 2-ci texniki dərəcəyə uyğun layihələndirilib. Avtomobil yolunun 12 kilometrlik hissəsi ikinci dərəcəyə uyğun yenidən qurulur. Bu hissədə torpaq yatağının eni 15 metr, zolaqların sayı 2 ədəd, hərəkət hissəsinin eni isə 7,5 metr olacaq.
Avtomobil yolunun 21,6 kilometr hissəsi 1-ci texniki dərəcəyə uyğun olaraq yenidən qurulur. Bu hissədə torpaq yatağının eni 26,5 metr, hərəkət hissəsinin eni 15 metr, hərəkət zolaqlarının sayı isə iki gediş, iki gəliş olmaqla, 4 hissədən ibarət olacaq. Yolboyu müxtəlif diametrli su ötürücü boruların tikintisi, 2 ədəd keçid, 5 ədəd körpünün inşası nəzərdə tutulub.
Avtomobil yolu Bərdə istiqamətindən Xankəndi, Şuşa və Laçın şəhərlərinə getmək istəyən sürücü və sərnişinlərin Ağdam şəhərinə daxil olmadan bu dairəvi yoldan istifadə edərək sürətlə və təhlükəsiz hərəkətlərini davam etdirmələrinə imkan verəcək. Yol bölgədə gediş-gəlişi asanlaşdıracaq, kənd təsərrüfatının, turizmin inkişafına əhəmiyyətli təsir göstərəcək”, - AAYDA rəsmisi əlavə edib.
Bizim.Media, Qarabağ bürosu
