Şimal bölgəsində yaşayan 100 yaşlı və bu yaşdan yuxarı 7 ən yaşlı seçici də bu gün parlament seçkilərinə öz münasibətini bildirəcək. Onlardan 6-ı qadın, biri isə kişidir.
Bizim.Media-nın yerli bürosu xəbər verir ki, uzunömürlü seçicilərin ən yaşlısı - 104 yaşlı Meynaz qızı Maqsudova Şabranın Ağbaş kəndində yaşayır.
MÖVZU İLƏ BAĞLI:
Bölgələrdə seçici aktivliyi – FOTOREPORTAJ
56 saylı Şabran-Xaçmaz seçki dairəsinin Ağbaş kəndindəki 30 saylı seçki məntəqəsindən bu gün Meynaz Maqsudovanın evinə daşınan seçki qutusu aparılıb.
Ağbaş kəndindəki 30 saylı məntəqənin üzvü Rəşad Cəlilov ən yaşlı seçiciyə vəzifələrini başa salıb və bülleteni daşınan qutuya necə salmağı izah edib. Bölgənin ən uzunömürlü sakini istədiyi namizədə öz səsini verib və hamıya uğurlar arzulayıb.
Qeyd edək ki, gün ərzində digər ən yaşlı 6 seçici 55 saylı Siyəzən-Quba-Xızı, 57 saylı Xaçmaz şəhər, 58 saylı Xaçmaz kənd, 60 saylı Quba-Qusar seçki dairələrinin əhatə etdiyi seçki məntəqələrində daşınan qutu vasitəsi ilə Milli Məclisə seçkilərə qatılacaqlar.
Aytəkin Alxaslı, Bizim.Media, Şimal bürosu
