Rüşvət almaqda ittiham olunan hakim qərardan kassasiya şikayəti VERDİ - FOTO

Rüşvət müqabilində ədalətsiz qərar çıxarmaqda ittiham olunan sabiq hakim İlyas Mahmudov barəsində olan hökmdən kassasiya şikayəti verib.

Bizim.Media apa-ya istinadən xəbər verir ki, şikayətə Ali Məhkəmədə hakim İlqar Qılıcovun sədrliyi ilə gələn ilin fevral ayında baxılacaq.

Xatırladaq ki, Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilən iclasda İlyas Mahmudovun doqquz il azadlıqdan məhrum edilməsi qərarı verilib.

Qeyd edək ki, 2008-19-cu illərdə Sumqayıt Şəhər Məhkəməsinin hakimi işləmiş İlyas Mahmudov 2022-ci ildə Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilib.

İttihamda deyilir ki, İ.Mahmudov icraatında olan müxtəlif mülki işlər üzrə iddiaçıların tələblərinin təmin edilməsi barədə bilə-bilə ədalətsiz qətnamə qəbul etməsi müqabilində ayrı-ayrı şəxslərdən rüşvət qismində pul alıb, iki halda ədalətsiz qətnamə çıxarıb.

Bundan başqa, onun icraatında olan digər işlər üzrə qəbul etdiyi 25 qətnaməyə əvvəlcədən bilə-bilə yalan məlumatlar daxil edib, əmək stajı və əlilliyin müəyyən edilməsi ilə bağlı qanunsuz məhkəmə aktlarının aidiyyəti qurumlara təqdim edilməsinə nail olub.

Hakimin bu hərəkətləri ilə də 243 min 441 manat pensiya ödənişinin verilməsinə səbəb olmaqla dövlətə zərər vurmasına dair əsaslı şübhələr müəyyən edilib. Ona qarşı Cinayət Məcəlləsinin 295.1 (bilə-bilə ədalətsiz hökm, qətnamə, qərardad çıxarma), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2 (təkrar rüşvətalma) və 313-cü (vəzifə saxtakarlığı) maddələri ilə ittiham irəli sürülüb.


Bizim.Media