Həyatını itirən Nəsiman Yaqublunun DOSYESİ

Hazırda oxunan: Həyatını itirən Nəsiman Yaqublunun DOSYESİ

Nəsiman Yaqublu haqqında məlumat. 1962-ci il fevral ayının 22-də Zəngilan rayonunda anadan olan Nəsiman Yaqublu, jurnalistika sahəsində fəaliyyət göstərmiş və bir çox kitab yazmışdır. Xocalı faciəsi, Azərbaycan Xalq Cümhuriyyəti, Məhəmməd Əmin Rəsulzadə və digər mövzularla bağlı araşdırmaları və yazıları olan Nəsiman Yaqublu cümhuriyyət və mətbuat tarixi ilə bağlı bir çox əsərə imza atmışdır. Allah rəhmət eləsin.

208351

Xəbər verdiyimiz kimi, professor Nəsiman Yaqublu Zəngilandan seçicilərlə görüşdən qayıdarkən qəzaya düşüb. O, müxtəlif dərəcəli bədən xəsarətləri alaraq xəstəxanaya çatdırılıb. Tibbi müdaxilələrə baxmayaraq, onun həyatını xilas etmək mümkün olmayıb.

Bizim.Media həyatını itirən Nəsiman Yaqublunun tərcümeyi-halını təqdim edir.

Nəsiman Yaqublu 1962-ci il fevral ayının 22-də Zəngilan rayonunun Zəngilan kəndində anadan olub. Zəngilan rayonunda orta təhsilini başa vurduqdan sonra Bakı Dövlət Universitetinin Jurnalistika fakültəsinə daxil olub. 1983-cü ildə təhsilini davam etdirmək üçün Rusiyaya gedib, Sankt-Peterburq Universitetinin Jurnalistika fakültəsində oxuyub.

1986-cı ildə Leninqrad Universitetini bitirdikdən sonra Bakıya qayıdıb. "Yazıçı" nəşriyyatında redaktor vəzifəsində çalışıb. 1990-cı ildə stalinizmin azərbaycanlı qurbanları haqqında "Ağrılı ömürlər" kitabını, 1991-ci ildə isə Azərbaycan Xalq Cümhuriyyəti və onun yaradıcısı olan Məhəmməd Əmin Rəsulzadə haqqında əsərini nəşr etdirib. 1992-ci ildə Xocalı faciəsi haqqında "Xocalı qırğını" kitabını yazıb və 30000 tirajla çap etdirib.

1993-cü ildə, Qarabağ Savaşında könüllü olaraq Azərbaycan ordusunda xidmətə başlayıb, "Azərbaycan ordusu" qəzetinin Baş redaktoru vəzifəsində çalışıb. 1993-cü ildən Bakı Dövlət Universitetinin Jurnalistika fakültəsində baş müəllim olaraq fəaliyyət göstərib.

Hacı Zeynalabdin Tağıyev adına Milli Mükafatın və Həsən bəy Zərdabi Mükafatının laueratıdır. Tarixi və publisistik yazıları Azərbaycanda, Türkiyədə və Polşada çap edilib.

2001-ci ildə "Azərbaycan Milli İstiqlal mübarizəsi və Məhəmməd Əmin Rəsulzadə" mövzusunda namizədlik dissertasiyasını, 2014-cü ildə "Azərbaycan milli istiqlal mücadiləsi və mühacirət mətbuatı" mövzusunda doktorluq dissertasiyasını müdafiə edib.

Azərbaycan Yazıçılar Birliyinin və Azərbaycan Jurnalistlər Birliyinin üzvü idi.

O, 2019-cu il mayın 27-də Azərbaycan Respublikası Prezidentinin 1205 nömrəli Sərəncamı ilə "Azərbaycan Xalq Cümhuriyyətinin 100 illiyi (1918-2018)" yubiley medalı ilə təltif edilib.

Cümhuriyyət, mətbuat tarixi və jurnalistika ilə bağlı onlarla kitabın müəllifidir.

Allah rəhmət eləsin.

Bizim.Media