“Azərbaycan Xəzər Dəniz Gəmiçiliyi” QSC-nin (ASCO) “Suraxanı” gəmi-muzeyinin qapıları 10 may tarixindən ziyarıtçilər üçün açıq elan olunur.
ASCO-dan Bizim.Media-ya verilən məlumata görə, Dənizkənarı Milli Parkda yerləşən muzey həftənin 5 günü saat 10:00-dan 19:00-dək ziyarətçilərin xidmətində olacaq.
Giriş biletlərinin qiyməti fərdi ziyarətçilər üçün 5 AZN, qruplar (seanslar) üzrə ziyarətçilər üçün 3 AZN müəyyənləşdirilib. Korporativ ziyarətçilər, tələbə və məktəblilər, ASCO-nun əməkdaşları və dənizçiləri, eləcə də onların ailə üzvləri (müvafiq sənəd təqdim edilməklə) 2 AZN ödəməklə muzeylə tanış ola biləcəklər.
MÖVZU İLƏ BAĞLI:
Milli Qəhrəmanın adını daşıyan gəmi təmir olundu
Körpələrə və 5 yaşadək uşaqlara, hamilə qadınlara, qapalı və qaranlıq məkanlarda panikadan əziyyət çəkən şəxslərə (klaustrofobiya və s.) gəmi-muzeyə giriş tövsiyə olunmur.
Bununla belə, Azərbaycanın Milli Qəhrəmanları, Şəhid ailələri, Sovet İttifaqı Qəhrəmanları, Böyük Vətən Müharibəsi, Əfqanıstan və Qarabağ müharibələrinin iştirakçıları, 20 Yanvar və Çernobıl hadisələri əlilləri, 1-ci və 2-ci qrup əlillər və onları müşayiət edən 1 nəfər şəxs, veteran dənizçilər, 5-12 yaş arası uşaqlar (12 yaş daxil olmaqla) “Suraxanı” gəmi-muzeyinə ödənişsiz və növbəsiz giriş hüququna malikdirlər.
Bizim.Media
