BİZİM TƏQVİM: 18 apreldə baş vermiş tarixi hadisələr

Bu gün Tarixi Abidələrin Mühafizəsi Günüdür. UNESCO-nun abidələrin və diqqətəlayiq yerlərin mühafizəsi məsələləri üzrə Beynəlxalq Şurasının 1983-cü ildə qəbul edilmiş qərarı əsasında hər ilin aprel ayının 18-də bu gün əlamətdar şəkildə qeyd olunur. Əsas məqsəd — dünya ictimaiyyətinin diqqətini maddi-mədəniyyət abidələrinin qorunmasına yönəltməkdir.

Bəs, aprelin 18-də dünyada daha hansı hadisələr baş verib?

1. 1923-cü ilin 18 aprelində Bakının Bibiheybət qəsəbəsindəki “Sevinc buxtası”nda ilk 6 quyu fontan vurub.

2. 18 aprel 1935-ci ildə XII Beynəlmiləl Qadın Konqresi Atatürkün himayəsində İstanbulun Yıldız sarayında toplandı. Konqresdə qadın haqları, bərabərlik, qadınların iqtisadiyyat və siyasətdə rolu, o cümlədən irqçilik və səhiyyə məsələləri müzakirə olundu.

3. 1951-ci ilin bu günü Paris Müqaviləsinin imzalanması ilə bugünkü Avropa İttifaqının əsaslarını yaradacaq ilk addım - Avropa Kömür və Polad Birliyi yaradıldı.

4. 18 aprel 1953-cü ildə Azərbaycan SSR Mədəniyyət Nazirliyi yaradılıb. Yeni nazirlik Kinematoqrafiya Nazirliyi, Mədəni-Maarif Müəssisələri Komitəsi, Radio Komitəsi, İncəsənət İşləri İdarəsi, Poliqrafiya Sənayesi, Nəşriyyat və Kitab Ticarəti İşləri İdarəsinin birləşdirilməsi nəticəsində təşkil edilib. Bundan öncə 15 mart 1953-cü il tarixdə SSRİ Mədəniyyət Nazirliyi yaradılmışdı.

5. 1954-cü ilin 18 aprelində Misirdə Camal Əbdülnasir çevriliş edərək krallıq rejiminə son qoyulub.

6. 18 aprel 1981-ci ildə tarixdə ən uzun professional beyzbol oyunu baş tutub. Bu oyun 23 iyunda başa çatıb.

7. 1989-cu ilin 18 aprel tarixində Türkiyədə süni mayalanmadan ilk uşaq İzmirdə Egey Universiteti Süni Mayalanma Mərkəzində  dünyaya gəlib.

8. 18 aprel 2001-ci ildə Azərbaycanda dövlət idarəçiliyində struktur islahatları ilə bağlı yeni nazirliklər – Yanacaq-Energetika Nazirliyi (hazırda Energetika Nazirliyi), Gənclər, İdman və Turizm Nazirliyi (hazırda Gənclər və İdman Nazirliyi) yaradılıb.

18 apreldə həm də bu tarixi şəxsiyyətlər xatırlanır:

1. Bu gün müasir fizikanın banisi, dünyanın ən məşhur və dahi alimlərindən olan Albert Eynşteynin anım günüdür. Albert Eynşteyn 1955-ci il aprelin 18-də 76 yaşında dünyasını dəyişib. 

2. Azərbaycanlı xanəndə Məcid Behbudov 18 aprel 1873-cü ildə anadan olub.

3. Azərbaycanın ilk peşəkar qadın müğənnisi, vokal sənətinin görkəmli nümayəndəsi Şövkət Məmmədova 1897-ci ilin bu günündə anadan olub.

4. Azərbaycanın Milli Qəhrəmanı Rasim İbrahimov 18 aprel 1962-ci ildə dünyaya gəlib.

5. Azərbaycanın Milli Qəhrəmanı “Topçu İskəndər” – İsgəndər Aznaurov 18 aprel 1993-cü ildə şəhid olub.

Surxay Atakişiyev, Bizim.Media