Azərbaycan Memarlıq və İnşaat Universitetində bu il fervarlın 24-dən 25-ə keçən gecə erməni təxribatının qarşısını alarkən qəhrəmancasına həlak olan, İnşaat Kollecinin tələbəsi Zakir Cəfərovun və ötən il aprel döyüşlərində şəhidlik zirvəsinə ucalan qəhrəmanlarımızın əziz xatirəsinə həsr olunan tədbir keçirildi. Tədbirdə Universitet və Kollec rəhbərliyi ilə yanaşı Zakir Cəfərovun Anası, qardaşı, habelə yaxınları iştirak edirdi.xa0
Azərbaycan Memarlıq və İnşaat Universitetinin rektoru, professor Gülçöhrə Məmmədova Azərbaycanın hazırkı gücündən, Silahlı Qüvvələrimizin mövcud vəziyyətindən və Şəhidlərimizin qanının yerdə qalmayacağına əminlik hisslərindən geniş söhbət açdı. O Zakirin qəhrəmanlıq nümunəsi olduğunu və onun kimi məzunların təhsil aldığı müəssisə ilə yanaşı bütün ölkənin başını uca etdiyini dilə gətirdi, həmçinin belə vətənpərvər gəncliyi olan dövlətin sarsıdılmasının mümkünsüzlüyünü ifadə etdi. Rektor torpaqlarımızın işğala məruz qalan hissəsinin azad edilməsi üçün Ali Baş Komandanın verəcəyi əmrin uzaqda olmadığına əminliyini bildirdi.xa0
Şəhid Zakir Cəfərovun anası Kəmalə xanım bu cür tədbirin təşkil olunmasına görə Universitet və Kollec rəhbərliyinə, minnətdarlıq etdi.
Daha sonra tələbələrin ifasında vətənpərvərliyi əks etdirən və şəhidlərin əziz xatirəsinə həsr olunan maraqlı musiqi və şeir numunələri dinlənildi.
