Şabranın Rəhimli kəndində Fərrux Ağamalıyevin fərdi təsərrüfatında baş verən yanğının qəsdən yandırıldığı ehtimal edilir.
Kənd sakinlərinin Bizim.Media-ya verdikləri məlumata görə, ev sahibi Fərrux Ağamalıyev yanan mal tövləsinin yanında yad ayaq izləri görüb.
MÖVZU İLƏ BAĞLI:
Şabranda mal-qara yandı - FOTO/VİDEO
Şabran rayon icra başçısının Rəhimli İnzibati Ərazi Dairəsi üzrə nümayəndəsi Samir Məmmədov da mal-qaranın sahibindən bu iddianı eşitdiyini bildirərək söyləyib ki, bu, hüquq-mühafizə orqanlarının, Fövqəladə Hallar Nazirliyinin araşdırmasından və ekspertizanın rəyindən sonra məlum olacaq.
Hələlik bu versiya təsdiqlənmir. Rəhimli icra nümayəndəsi açıqlama verib ki, yanğın nəticəsində sakinə 30-40 min manat arası ziyan dəyib.
Bütün heyvanı - 8 baş iri ana, 8 baş bala olmaqla, 16 baş iri buynuzlu mal-qarası, 60 toyuğu tələf olub və 100-dən çox ot bağlaması yanıb. Mal tövləsinin qəsdən yandırılmasını ekspertizaların rəyi müəyyən edəcək.
Aytəkin Alxaslı, Bizim.Media, Şimal bürosu
