Müəllimlər əmək haqlarına əlavələri oktyabr maaşında alacaqlar – RƏSMİ

“Bu il müəllimlərin sertifikatlaşdırılması prosesi qaydalara uyğun həyata keçirildi. Sertifikatlaşdırmadan uğurla keçən müəllimlər məktəbdə qalır, maaşlarına əlavələr alır, uyğun olmayanların isə gələcəkdə əmək müqaviləsinə xitam veriləcək”.

Bizim.Media xəbər verir ki, bunu AZƏRTAC-a açıqlamasında elm və təhsil naziri Emin Əmrullayev deyib. O bildirib ki, müəllimlərin sertifikatlaşdırılması prosesi növbəti illərdə də davam edəcək.

“Növbəti tədris ilində hansı fənn müəllimlərinin sertifikatlaşdırmadan keçəcəyi yaxın zamanda ictimaiyyətə açıqlanacaq. Sertifikatlaşdırma prosesindən uğurla keçən müəllimlərin əmək haqlarına əlavələr sentyabrdan hesablanacaq. Təhsilverənlər əlavələri oktyabr maaşında alacaqlar”.
Xatırladaq ki, oktyabrın 14-dək təşkil olunan sertifikatlaşdırma prosesinin müsahibə mərhələsində 21 min 883 nəfər müəllim iştirak edib. Onlardan 21 min 784 nəfəri uğur qazanıb.

Sertifikatlaşdırmadan keçmiş 5246 müəllimin vəzifə maaşına 35 faiz, 17914 müəllimin vəzifə maaşına isə 10 faiz artım tətbiq olunacaq.

Sertifikatlaşdırmanın müsahibə mərhələsində iştirak etməyən və ya uğur qazanmayan müəllimlər bir il müddətində iş yeri saxlanılmaqla, təkrar sertifikatlaşdırmanın müsahibə mərhələsində iştirak etmək hüququna malikdirlər.

Bizim.Media