Gecə olmasına baxmayaraq işimizi davam etdiririk - AzQAC-ın vitse-prezidenti

"Ərzaq yükün erməniəsilli sakinlərə çatdırmaq üçün Qızıl Aypara Cəmiyyətinin rəhbərliyi Rusiya sülhməramlılarının komandanlığı ilə danışıqlar aparmışdı, onlar cavab vermək üçün bizdən müəyyən zaman istəmişdilər. Ancaq artıq 6-cı gün bitir, hələ də onlardan bizə bir cavab gəlməyib".

Bizim.Media xəbər verir ki, bunu apa.az-a açıqlamasında Azərbaycan Qızıl Aypara Cəmiyyətinin (AzQAC) vitse-prezidenti Qafar Əsgərzadə deyib.

O, bildirib ki, Azərbaycan Qızıl Aypara Cəmiyyətinin əməkdaşları, könüllüləri, rəhbər vəzifəli şəxsləri öz humanitar misiyasını yerinə yetirmək üçün Ağdam Xankəndi yolunda gözləməkdədir:

"Əsas məqsədimiz Qarabağ İqtisadi zonasında yaşayan erməniəsilli sakinlərə ərzaq yardımı göstərməkdir. 40 ton unla yüklü olan iki yük maşınını erməniəsilli sakinlərə çatdırmaq üçün bütün qüvvələrimizi səfərbər etmişik. 

Bununla bağlı Qızıl Aypara Cəmiyyətinin rəhbərliyi ilə Rusiya sülhməramlı qüvvələrinin komandanlığı arasında müvafiq danışıqlar aparılıb. Onlar bizdən müəyyən zaman istəmişdilər ki, bir müddət sonra onlar bizə ərzaq yüklərinin çatdırılması ilə bağlı cavab verəcəklər. 

Artıq bugün 6-cı gün bitmək üzrədir ancaq onlardan hər hansı bir cavab gəlməyib. Amma buna baxmayaraq biz gözləmə mövqeyindəyik öz vəzifəmizin başındayıq. Ərzaq yükünü erməniəsilli vətəndaşlara çatdırana qədər öz işimizi davam etdirəcəyik. 
Əlbəttə, bu xeyirxah addımımız həm milli qanunvericiliyə, həm Qızıl Aypara Cəmiyyətinin nizamnaməsinə, həm də, müəyyən beynəlxalq sənədlərə uyğundur. Çünkü Qızıl Aypara Cəmiyyətinin əsas missiyası insanların yanında olmaqdır, onlara dəstək olmaqdır. 

Bu məqsədlə də, biz burdayıq və güman edirəm ki, tezliklə biz bu ərzaq yükün həmin insanlara çatdıracayıq. Burada əsas məsələ ondan ibarətdir ki, müəyyən razlıq əldə olunarsa, bizim əməkdaşlarımız, könüllülərimiz bu yardımı o insanlara çatdıracaq. 

Eyni zamanda tam mənada təhlükəsizlik təmin olunarsa, müəyyən şərait yaradılarsa, bizim cəmiyyətimizin əməkdaşları, müəyyən mütəxəssisləri cəlb etməklə monitorinq işləri aparacaq və qiymətləndirmədən sonra həqiqətən də, insanların nəyə ehtiyacları varsa bizim tərəfimizdən təmin ediləcək".

Qeyd edək ki, 40 ton un olan yük avtomobilləri avqustun 29-dan Ağdam-Əsgəran-Xankəndi yolunda, Rusiya sülhməramlılarının postunun qarşısında gözləyir.


Bizim.Media