Xaçmaz qaziləri Şəhidlər Xiyabanında - FOTO

Xaçmazda Vətən Müharibəsi iştirakçılarının Bakı şəhərinə turu təşkil edilib. Şəhid Orxan Osmanov adına "Şah" Cüdo İdman Klubunun təşkilatçılığı ilə təşkil edilən tur Heydər Əliyevin anadan olmasının 100 illiyi ilə əlaqədar keçirilən tədbirlərə daxildir.

Vətən Müharibəsi qazisi Aydın Fətiyevin Bizim.Media-ya verdiyi məlumata görə, tur iştirakçıları və onları müşayiət edən mədəniyyət işçiləri əvvəlcə Fəxri Xiyabanda milli lider Heydər Əliyevin abidəsini ziyarət edib, abidə önünə tər güllər düzüb, ruhunu ehtiramla yad ediblər.

Daha sonra Şəhidlər Xiyabanını, 2-ci Fəxri Xiyabanı ziyarət edən xaçmazlı Vətən Müharibəsi iştirakçıları Azərbaycanın müstəqilliyi və ərazi bütövlüyü uğrunda həyatdan gedən bütün şəhidlərin xatirəsini hörmətlə anıblar.
Sonra Qənimətlər Parkına da baş çəkən  iştirakçılar Vətən Müharibəsində hərbçilərimizin erməni ordusundan əldə etdiyi  silah-sursata böyük maraqla baxış keçiriblər.

Bakı səfərinin reallaşması rayon icra hakimiyyətinin və Xaçmaz  regional mədəniyyət idarəsinin dəstəyi və təşəbbüsü ilə baş tutub.

Tur iştirakçılarını nəqliyyat vasitəsi ilə Xaçmaz avtovağzalı təmin edib.














Aytəkin Alxaslı, Bizim.Media, Şimal bürosu