“Azərbaycan Dəmir Yolları” QSC-nin sədr müavini Hicran Valehov vəzifəsindən AZAD OLUNUB?  

Azərbaycan Dəmir Yolları QSC-nin sədr müavini Hicran Valehovun işdən çıxarıldığı iddia olunur. 

Bizim.Media-nın əldə etdiyi məlumata görə “Azərbaycan Dəmir Yolları” Qapalı Səhmdar Cəmiyyətinin sədri Rövşən Rüstəmovun əmri ilə Hicran Valehov vəzifəsindən kənarlaşdırılıb. Hətta Hicran Valehovun iş otağının boşaldıldığı da deyilir.

Sözügedən iddialarda onun hansı səbəbdən işdən uzaqlaşdırıldığı qeyd olunmayıb.

Xatırladaq ki, Prezidentin sərəncamı ilə Rəqəmsal inkişaf və nəqliyyat nazirinin müavini təyin edilən Cavid Qurbanovun əvvəlki vəzifəsini - Azərbaycan Dəmir Yolları QSC sədrliyini bir müddət onun müavini Hicran Valehov icra edib.  Hicran Qardaşxan oğlu Valehov 1968-ci ildə anadan olub, Azərbaycan İnşaat Mühəndisləri Universitetini bitirib, texniki elmlər namizədidir.

1985-2007-ci illərdə Kəlbəcər rayonu Sığorta Müfəttişliyi, “Azəravtoyol” Dövlət Şirkətinin 1 saylı Yol Təmir Tikinti İdarəsi, Yol Fondu İdarəsi, “Elm-İstehsalat Mərkəzi” və Azərbaycan Respublikası Nəqliyyat Nazirliyinin “Yolnəqliyyatservis” Departamentində müxtəlif vəzifələrdə çalışıb.
2007-2015-ci illərdə “Azəryolservis” Açıq Səhmdar Cəmiyyətinin sədr müavini olub.
2016-cı ildən Prezidentin sərəncamı ilə “Azərbaycan Dəmir Yolları” Qapalı Səhmdar Cəmiyyəti sədrinin müavini vəzifəsinə təyin edilib. 

Cavid Qurbanovun yaxın adamı və həmyerlilərindən olan  Hicran Valehovun adı bir neçə qalmaqallarda da çəkilib. Buna görə isə o,  ictimaiyyətdə ”boz kardinal” ləqəbi ilə tanınıb. 

2022-ci ilin mayında “Azərbaycan Dəmir Yolları” Qapalı Səhmdar Cəmiyyətinin sədri vəzifəsindən azad edilən Cavid Qurbanovu 7 ay Hicran Valehov əvəzləyib. Həmin ilin dekabrında isə qurumun sədr vəzifəsinə Rövşən Rüstəmov təyinat alıb. 

Onu da bildirək ki, “Azərbaycan Dəmir Yolları” Qapalı Səhmdar Cəmiyyətinə yeni sədr təyinatından iki ay sonra qurumda kütləvi ixtisarlar başlayıb.

Yeni sədr ömrünü Azərbaycan Dəmir Yollarına həsr etmiş köhnə kadrları işdən çıxarmağa başlayıb.

Öncə Azərbaycan Dəmir Yolları” QSC-də Təsərrüfat Departamentinin sədr müavini kimi çalışan Mehman Əliyev, ardınca isə Təsərrüfat Departamentinin 35 nəfərinə müqavilə müddətinin bitməsi səbəbindən işlərinə xitam veriləcəyi ilə bağlı xəbərdarlıq edilib. 
Sözügedən məlumatın həqiqətəuyğun olub-olmadığını öyrənmək üçün Azərbaycan Dəmir Yolları QSC ilə əlaqə yaratdıq. Qurumun mətbuat katibi məlumatı nə inkar, nə də təsdiq edib. 

Alçina Amilqızı, Bizim.Media