Hərbçilərin maaşlarına əlavələr ediləcək - Deputat

"Azərbaycanın ərazi bütövlüyü uğrunda vuruşan və hazırda xidmət çəkən hərbçilərin fədakarlığının heç bir maddi qarşılığı ola bilməz".

Bizim.Media-nın məlumatına görə, bu barədə  millət vəkili Kamal Cəfərov feysbuk hesabında yazıb. 

Hərbçilərin maaşlarının birqata endirilməsi məsələsinə münasibət bildirən deputat Müdafiə Nazirliyinə sorğu göndərdiyini qeyd edib:

"Bununla bağlı mən də Milli Məclisin deputatı kimi Müdafiə Nazirliyinə şifahi deputat sorğusu göndərərək, aidiyyəti komitə rəhbərlərinə məruzə etmişəm.

"Hərbi qulluqçuların statusu haqqında" Qanunun 10.2-ci maddəsinə uyğun olaraq, döyüş şəraitində, döyüş əməliyyatlarında iştirak edən hərbi qulluqçulara həmin dövr üçün ödənilməli olan pul təminatı ikiqat hesablanıb və ödənilib".

"Bununla yanaşı, işğaldan azad edilmiş ərazilərdə xidmət edən, o cümlədən, hərbi hissənin yerləşdiyi ərazinin iqlim şəraiti, yüksəkliyi və digər məqamları nəzərə alınmaqla, hərbi qulluqçuların əməkhaqlarına əlavələr əmsallar formasında ediləcək.

Bununla bağlı olaraq, aidiyyəti qurumlar tərəfindən müvafiq fəaliyyət həyata keçirilib. Yaxın zamanlarda, hərbi qulluqçuların əməkhaqlarına əlavələrin verilməsi Nazirlər Kabinetinin qərarı formasında təmin olunacaq", - deyə o qeyd edib.

Bizim.Media