İşçilər əməyin mühafizəsi tədbirlərinə görə xərc çəkməyəcək – RƏSMİ

Hazırda oxunan: İşçilər əməyin mühafizəsi tədbirlərinə görə xərc çəkməyəcək – RƏSMİ

122362

Əməyin mühafizəsi tədbirlərinin maliyyələşdirilməsi ilə bağlı işçilər heç bir xərc çəkməyəcək.

Bizim.Media xəbər verir ki, bu Milli Məclisin bu gün keçirilən plenar iclasında III oxunuşda müzakirəyə çıxarılan Əmək Məcəlləsinə təklif edilən dəyişiklikdə əksini tapıb.

Qeyd edilib ki, Beynəlxalq Əmək Təşkilatının “Əməyin Təhlükəsizliyi və Gigiyenası haqqında” 1981-ci il tarixli 155 nömrəli Konvensiyasının 21-ci maddəsinə əsasən, əməyin təhlükəsizliyi və gigiyenası üzrə tədbirlər işçilər üçün hər hansı bir xərci özündə ehtiva etmir.

Sağlam və təhlükəsiz əmək şəraitinin yaradılması ilə bağlı mümkün xərclərin çəkilməsindən işçilərin qorunması sahəsində sözügedən Konvensiyanın 21-ci maddəsinin bütövlüklə tətbiqi milli qanunvericiliklə tam təmin edilmədiyindən Əmək Məcəlləsində dəyişiklik edilməsi zərurəti yaranıb.

Qanun layihəsini parlamentə təqdim edən Əmək və sosial siyasət komitəsinin sədri Musa Quliyev bildirib ki, konvensiya ratifikasiya edildikdən sonra milli qanunvericiliyimiz müvafiq konvensiyaya uyğun olaraq təkmilləşdiriləcək.
Layihə III oxunuşda qəbul olunub.

Murad Əhmədov, Bizim.Media