Moderator.az-ın xəbərinə, 110 nəfər qəbula yazılıb və onlar saat 16:00-dək deputat tərəfindən ayırılıqda qəbul ediliblər.
Hansı rayonu və dairəni təmsil etməsindən asılı olmayaraq deputat vətəndaşları dinləyib, qaldırdıqları problemlərin həlli üçün maksimum diqqət və qayğı göstərəcəyini bildirib.
Quba üçün xarakterik olan işsizlik, əhalinin maddi vəziyyətinin aşağı olması səbəbindən qaz, işıq və su pullarının vaxtında ödəyə biməmələri və bununla bağlı yaranan problemlər, banklara əhalinin çox böyük əksəriyyətinin borclu olması, gənc aillələrdə boşanma hallarının çoxluğu və bundan yaranan problemlər, yerli-yersiz sosial yardım almaq üçün edilən səylər, bəzi hallarda idarə rəhbərlərinin əhalinin qayğılarına biganə, laqeyd yanaşmaları və bir sıra digər məsələlər seçilərin qaldırdıqları əsas məsələlərdən olub.
Mərkəzi təşkilatlardan asılı olan müraciətlərin həlli üçün deputat tərəfindən köməkçiyə müvafiq tapşırıqlar verilib, müraciətlər nəzarətə götürülüb.
Deputat köməkçisi Arif Orucovun Moderator.az-a bildirib ki, qəbul prosesində seçicilər tərəfindən qaldırılan problemlərin həlli üçün deputat tərəfindən idarə və müəssisə rəhbərlərinə edilən müraciətlərin böyük əksəriyyəti başadüşülən şəkildə qarşılanır və operativ həllini tapır: "Sevindirici haldır ki, əvvəlki qəbullarda qaldırılmış və həllini tapmış məsələlərə görə bir neçə seçici də uzun növbə gözləyərək deputata öz minnətdarlıqlarını bildiriblər. Dekabr ayında daha bir qəbul planlaşdırılıb".
