Ölkə əhalisinin 91 faizi Azərbaycanın Birinci Vitse-prezidenti Mehriban Əliyevaya etibar etdiyini bildirib.
Bizim.Media xəbər verir ki, bunu Sosial Tədqiqatlar Mərkəzinin (STM) 2022-ci ilin may-avqust aylarında keçirdiyi rəy sorğusunun nəticələri göstərir.
Sorğunun nəticələrinə əsasən respondentlərin 91 faizi Birinci vitse-prezident Mehriban Əliyevaya etibar etdiyini, etimad göstərdiyini vurğulayıb.
Rəyi soruşulanların 75.4%-i Azərbaycanın Birinci Vitse-prezidenti Mehriban Əliyevaya tam etibar etdiyini, 15.3%-i isə əsasən etibar etdiyini bildirib.
Respondentlərin cəmi 1.6%-i əsasən etibar etmədiyini, 5.5%-i heç etibar etmədiyini qeyd edib. 2.2% respondent bu istiqamətdə fikir bildirməkdə çətinlik çəkib.
MÖVZU İLƏ BAĞLI:
Ölkə əhalisinin 84.7%-i İlham Əliyevə tam etibar edir – SORĞU
Sorğuda hakimiyyətin digər qollarına, parlament və məhkəmə təsisatlarına olan ictimai inam və etimad səviyyəsi də öyrənilib. Respondentlərin 31.6%-i Milli Məclisə tam etibar etdiyini, 31.7%-i əsasən etibar etdiyini bəyan edib. Respondentlərin 9.8%-i əsasən etibar etmədiyini, 22.3%-i isə heç etibar etmədiyini bildirib. 4.7% respondent bu istiqamətdə fikir bildirməkdə çətinlik çəkib.
Qeyd edək ki, sorğu Bakı, Abşeron-Xızı, Dağlıq Şirvan, Gəncə-Daşkəsən, Qazax-Tovuz, Lənkəran-Astara, Quba-Xaçmaz, Şəki-Zaqatala, Qarabağ, Mərkəzi Aran, Mil-Muğan və Şirvan-Salyan iqtisadi rayonlarında keçirilib və 1068 respondentin rəyi öyrənilib.
Tədqiqat çərçivəsində respondentlərin seçimində təsadüfi seçmənin klaster üsulundan istifadə edilib. Respondentlərin seçimində gender balansı qorunub. Sorğuda əhatə edilmiş respondent sayına (1068 nəfər) əsasən, nəticələrin xəta əmsalı 95% əminlik intervalında 3% təşkil edib. Sorğunun hər respondent üzrə orta davametmə müddəti 17 dəqiqə 4 saniyədir. Sahə işi 2022-ci ilin 12 sentyabr– 27 sentyabr tarixlərində icra edilib.
Bizim.Media
